Најголемата драгоценост којашто ја поседувам е моето семејство – Владимир Георгиевски, генерален секретар на КФСМ и сопственик на Cherry Orchard

Најголемата драгоценост којашто ја поседувам е моето семејство – Владимир Георгиевски, генерален секретар на КФСМ и сопственик на Cherry Orchard

1. Која е Вашата претстава за совршена среќа?

– Мислам дека совршена среќа не постои, тоа е субјективна перцепција на моментот.

2. Кој е Вашиот најголем страв?

– Немам некој посебен најголем страв што би го издвоил, веројатно оние стравови стандардни што ги имаат нормалните луѓе во дадени животни ситуации.

3. Со која историска фигура би се поистоветиле?

– Не би се поистоветувал со никого,  секое време си носи свои херои и фигури, ајде да кажеме дека во некои ситуации се споредувам сам со себе во однос на минатото и сегашноста.

4. На кого најмногу му се воодушевувате?

– На успешните луге кои успеале да ја задржат својата едноставност и спонтаност.

5. Која Ваша карактерна особина не ја поднесувате кај себе?

– Можеби импулсивноста и избувливоста, некогаш и некоја доза на нестрпливост во одредени ситуации.

6. Која е Вашата најголема екстраваганција?

– Се трудам да останам едноставен и рационален, нешто што во минатото било повеќе од нормално, а денеска е преминато во екстраваганција.

7. Кое е Вашето омилено патување?

– Сум бил на многу патувања, меѓутоа едно од најомилените дефинитивно ми е моето свадбено патување, 20 дневна обиколка на Италија.

8. Во кои прилики лажете?

– Во прилики кога вистината би донела големи последици, а малата лага не би нанела никаква штета.

9. Која карактерна особина кај човекот сметате дека е најпреценета?

– Во денешно време можеби скромноста, бидејќи колку што може да биде голема доблест, често носи и негативни последици на СКРОМНИОТ.

10. Кои зборови и реченици најчесто ги користите?

– Немам некои секојдневни зборови или реченици или барем не сум се фатил сам себе како повторувам нешто често.

11. Што не Ви се допаѓа во Вашиот физички изглед?

– Хахаха се имам прифатено себе со сите мани и доблести.

12. За што најмногу сте се покајале во животот?

– Нема нешто досега за што животно сум се покајал или допрва ќе дојде таква ситуација или пак сум се навикнал да живеам без да погледнувам наназад.

13. Кој-а е љубовта на Вашиот живот?

– За многу кратко време на мене и на мојата сопруга љубовта на нашиот живот стана нашиот 8 месечен син ИВАН.

14. Кога и каде сте биле најсреќни?

– Искрено пробувам во секој момент да бидам среќен, се разбира доколку тоа го дозволува дадената ситуација, но секако најсрекен е раѓањето на мојот син.

15. Кој талент би сакале да го поседувате?

– Можеби еден од талентите кои сакам да ги поседувам, е да знам убаво да пеам. Желбата е тука фали уште талентот 😊

16. Како се чувствувате моментално?

– Замислено, барам одговори на зададените прашања.

17. Што сметате за Ваш најголем успех?

– Toa што и покрај секојдневните животни искушенија успеав да останам нормален човек и станав фамилијарен човек.

18. Ако после смртта би се вратиле на овој свет, што би биле?

– Був, би ги прател спокојно сите случување без да коментирам.

19. Која е најголемата драгоценост која ја поседувате?

– Семејството.

20. Што претставува за вас разочарувањето?

– Неисполнето очекување.

21. Со која професија (освен оваа) би сакале да се занимавате?

– Сигурно би било нешто во врска со спортот.

22. Кој е Вашиот идол (пример) во животот?

– Веројатно во различни времиња на растењето сум имал различни идоли,за сега да останам без некој посебен идол.

23. Кој е Вашиот омилен сликар, а кој писател?

– Искрено не сум некој познавач на сликарството, еве би го издвоил можеби Салвадор Дали, имав прилика да ги видам неговите дела во Барселона, а сум голем љубител на убавата книга и има многу писатели кои би ги издвоил, еве на пример Екарт Тол, Лобсанг Рампа, Наполеон Хил, Робин Шарма а од секојдневните теми и романи, Гијом Мисо, Лингвуд Баркли, Донато Каризи……..

24. Кој е Вашиот фиктивен јунак?

– Супермен.

25. Каде би сакале да живеете?

– Би останал да живеам тука и покрај сите случувања и околности во нашата држава, но би сакал да патувам барем секој месец по десетина дена низ различни дестинации во светот.

26. Што најмногу мразите?

– Алчни луѓе и гужва во сообраќај.

27. Која човечка особина ве иритира?

– Алчноста.

28. Кое е Вашето мото?

– Најдобар рецепт да бидеш незадоволен е да се обидеш секој друг да го направиш задоволен.

29. Кои квалитети ги вреднувате кај мажите?

– Успешност со задржана едноставност.

30. Кои квалитети ги вреднувате кај жените?

– Исклучително ги вреднувам жените што се способни да направат дијаметрална трансформација од семејна жена дома со сите домаќински работи, до топ модел и бизнис елеганција надвор од домот и способност за изнаоѓање баланс помеѓу професионално остварување и среден дом.

31. Што е за вас вистински пријател?

– Оној кој еднакво се радува на твоите успеси, и тука е, со тебе во неуспесите.

дипл. спец. Оливера Антиќ

Главен уредник на VipHeart.mk